ಇಲ್ಲ, ಕರ್ನಾಟಕ ಸರ್ಕಾರವು ರಂಜಾನ್ ತಿಂಗಳಲ್ಲಿ ಶಾಲಾ ಸಮಯವನ್ನು ಬದಲಾಯಿಸಿಲ್ಲ

ಕರ್ನಾಟಕದ ಕಾಂಗ್ರೆಸ್ ಸರ್ಕಾರವು ರಂಜಾನ್ ತಿಂಗಳ ಎಲ್ಲಾ ಶಾಲೆಗಳ ಸಮಯವನ್ನು ಬದಲಾಯಿಸಿದೆ ಎಂದು ಹೇಳುವ ಮೂಲಕ ಎಕ್ಸ್ (ಹಿಂದಿನ ಟ್ವಿಟರ್) ಮತ್ತು ಫೇಸ್‌ಬುಕ್ ಸೇರಿದಂತೆ ಪ್ಲಾಟ್‌ಫಾರ್ಮ್‌ಗಳಲ್ಲಿ ಸಾಮಾಜಿಕ ಮಾಧ್ಯಮ ಪೋಷ್ಟ್ ಗಳನ್ನು ಹಂಚಿಕೊಳ್ಳಲಾಗುತ್ತಿದೆ. ಏಪ್ರಿಲ್ ೧೦, ೨೦೨೪ ರವರೆಗೆ ರಾಜ್ಯದಲ್ಲಿ ಸರ್ಕಾರಿ ಉರ್ದು ಶಾಲೆಗಳಿಗೆ ಮಾತ್ರ ವೇಳಾಪಟ್ಟಿಯನ್ನು ಬದಲಾಯಿಸಲಾಗಿದೆ. ಈ ಬದಲಾವಣೆಯು ಇನ್ನಿತರ ಶಾಲೆಗಳಿಗೆ ಅನ್ವಯಿಸುವುದಿಲ್ಲ.

ಹೇಳಿಕೆ:

ಇಸ್ಲಾಮಿಕ್ ಉಪವಾಸದ ತಿಂಗಳಾದ ರಂಜಾನ್‌ನಲ್ಲಿ ಕರ್ನಾಟಕ ಸರ್ಕಾರವು ಎಲ್ಲಾ ಶಾಲೆಗಳಿಗೆ ಶಾಲಾ ಸಮಯವನ್ನು ಬದಲಾಯಿಸಿದೆ ಎಂಬ ಹೇಳಿಕೆಯನ್ನು ವಿವಿಧ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗಿದೆ.

ಅಂತಹ ಒಂದು ಪೋಷ್ಟ್ 'Mr. Sinha” ಎಂಬ ಎಕ್ಸ್ (ಹಿಂದೆ ಟ್ವಿಟರ್) ಬಳಕೆದಾರರು ಹಂಚಿಕೊಂಡಿದ್ದಾರೆ. ಮಾರ್ಚ್ ೧೨, ೨೦೨೪ ರಂದು ಹಂಚಿಕೊಂಡ ಈ ಪೋಷ್ಟ್ ನ ಶೀರ್ಷಿಕೆ ಹೀಗಿದೆ, "ಕಾಂಗ್ರೆಸ್ ಆಡಳಿತ ಕರ್ನಾಟಕದಲ್ಲಿ #Ramadan ಸಮಯದಲ್ಲಿ ಶಾಲೆಯ ಸಮಯವನ್ನು ಬದಲಾಯಿಸಿದೆ. ಅದೇ ಸರ್ಕಾರವು ಹಿಂದೂಗಳಿಗೆ ಹನುಮಾನ್ ಧ್ವಜವನ್ನು ಹಾರಿಸುವುದಕ್ಕೆ ನಿಷೇಧ ಏರ್ಪಡಿಸಿದೆ (ಕನ್ನಡಕ್ಕೆ ಅನುವಾದಿಸಲಾಗಿದೆ)," ಎಂದು ಓದುತ್ತದೆ. ಈ ಪೋಷ್ಟ್ ೨೩೮ ಸಾವಿರ ವೀಕ್ಷಣೆಗಳು, ೧೪ ಸಾವಿರ ಇಷ್ಟಗಳು ಮತ್ತು ೬.೬ ಸಾವಿರ ಮರುಪೋಷ್ಟ್ ಗಳನ್ನೂ ಗಳಿಸಿದೆ.

Mr. Sinha ಎಕ್ಸ್ ನಲ್ಲಿ ಹಂಚಿಕೊಂಡ ಪೋಷ್ಟ್ ನ ಸ್ಕ್ರೀನ್‌ಶಾಟ್‌ಗಳು.

ಎರಡು ಸುದ್ದಿ ಪೋರ್ಟಲ್‌ಗಳು - ಕನ್ನಡ ಪ್ರಭ ಮತ್ತು ನ್ಯೂಸಿಕ್ಸ್ - ಮೇಲಿನ ಹೇಳಿಕೆಗಳನ್ನು ವರದಿಯಾಗಿ ಕೂಡ ಪ್ರಕಟಿಸಿವೆ.

ಕನ್ನಡ ಪ್ರಭ ಮತ್ತು ನ್ಯೂಸಿಕ್ಸ್‌ಸುದ್ದಿ ವರದಿಗಳ ಸ್ಕ್ರೀನ್‌ಶಾಟ್‌ಗಳು.

ಪುರಾವೆ:

ನಿರ್ದಿಷ್ಟ ಕೀವರ್ಡ್‌ಗಳನ್ನು ಹುಡುಕಿದ ನಂತರ, ಮಾರ್ಚ್ ೦೮, ೨೦೨೪ ರಂದು ಪ್ರಕಟವಾದ ಪ್ರಜಾವಾಣಿ ಸುದ್ದಿ ವರದಿಯನ್ನು ನಾವು ಕಂಡುಕೊಂಡಿದ್ದೇವೆ. ಹಿಂದಿನ ವರ್ಷಗಳಿಗೆ ಅನುಗುಣವಾಗಿ ರಂಜಾನ್ ಸಮಯದಲ್ಲಿ ಉರ್ದು ಶಾಲೆಗಳಿಗೆ ಹೊಂದಾಣಿಕೆಗಳನ್ನು ಮಾಡಲಾಗಿದೆ ಎಂದು ವರದಿ ಹೇಳಿದೆ. ಪರಿಷ್ಕೃತ ವೇಳಾಪಟ್ಟಿಯು ಈಗ ಶಾಲಾ ಸಮಯವನ್ನು ಬೆಳಿಗ್ಗೆ ೮:೦೦ ರಿಂದ ಮಧ್ಯಾಹ್ನ ೧೨:೪೫ ರವರೆಗೆ ನಿಗದಿಪಡಿಸುತ್ತದೆ. ಇದು ಪ್ರಮಾಣಿತ ೯:೩೦ ರಿಂದ ಸಂಜೆ ೪:೦೦ ರವರೆಗೆ ಅಲ್ಲ, ಎಂದು ವರದಿಯು ಹೇಳಿಕೊಂಡಿದೆ.

ನ್ಯೂಸ್ 18 ಕನ್ನಡ ವರದಿಯು ಸಹ ಇದನ್ನೇ ಹೇಳಿದೆ ಮತ್ತು ಸಮಯದ ಬದಲಾವಣೆಯು ಉರ್ದು ಪ್ರಾಥಮಿಕ ಮತ್ತು ಪ್ರೌಢಶಾಲೆಗಳಿಗೆ ಸೀಮಿತವಾಗಿದೆ ಮತ್ತು ಏಪ್ರಿಲ್ ೧೦, ೨೦೨೪ ರವರೆಗೆ ಇರುತ್ತದೆ ಎಂದು ಗಮನಿಸಿದೆ. ಇತರ ಸಂಸ್ಥೆಗಳಿಗೆ ನಿಯಮಿತ ಶಾಲಾ ಸಮಯವು ಬದಲಾಗದೆ, ಬೆಳಿಗ್ಗೆ ೧೦:೦೦ ರಿಂದ ೪:೦೦ ರವರೆಗೆ ಕಾರ್ಯನಿರ್ವಹಿಸುತ್ತದೆ ಎಂದು ಕೂಡ ವರದಿ ಮಾಡಿದೆ.

ನ್ಯೂಸ್ 18 ಕನ್ನಡದಿಂದ ಸುದ್ದಿ ವರದಿಯ ಸ್ಕ್ರೀನ್‌ಶಾಟ್.

ಇದೇ ರೀತಿಯ ಸುದ್ದಿ ವರದಿಗಳನ್ನು ಮಾರ್ಚ್ ೦೮, ೨೦೨೪ ರಂದು ಉದಯವಾಣಿ ಮತ್ತು ಟಿವಿ9 ಕನ್ನಡ ಪ್ರಕಟಿಸಿದ್ದು, ಕರ್ನಾಟಕ ಉರ್ದು ಮತ್ತು ಇತರ ಅಲ್ಪಸಂಖ್ಯಾತ ಭಾಷಾ ಶಾಲೆಗಳ ನಿರ್ದೇಶನಾಲಯದಿಂದ ಉರ್ದು ಶಾಲೆಗಳ ಸಮಯ ಬದಲಾವಣೆಯನ್ನು ಘೋಷಿಸಿ ಸುತ್ತೋಲೆ ಹೊರಡಿಸಲಾಗಿದೆ ಎಂದು ವರದಿ ಮಾಡಿವೆ. ಉರ್ದು ಶಾಲೆಗಳ ಸಮಯದ ಬದಲಾವಣೆಯು ಉರ್ದು ಶಾಲೆಗಳಲ್ಲಿ ಮಾತ್ರ ಅನ್ವಯವಾಗಿದ್ದರೂ, ಇತರ ಸರ್ಕಾರಿ ಅನುದಾನಿತ ಮತ್ತು ಅನುದಾನ ರಹಿತ ಶಾಲೆಗಳಲ್ಲಿ ಮುಸ್ಲಿಂ ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿಗೆ ಸಂಜೆ ೩೦ ನಿಮಿಷ ಮುಂಚಿತವಾಗಿ ಹೊರಡಲು ಅವಕಾಶ ನೀಡಲಾಗಿದೆ ಎಂದು ಟಿವಿ9 ಕನ್ನಡ ವರದಿಯಲ್ಲಿ ಸೇರಿಸಲಾಗಿದೆ.

ಅಲ್ಲದೆ, ರಾಜ್ಯಾದ್ಯಂತ ಈ ರೀತಿಯ ಆದೇಶ ಇದೇ ಮೊದಲಲ್ಲ. ಹಿಂದೂಸ್ತಾನ್ ಗೆಜೆಟ್ ಕನ್ನಡದ ವರದಿಯ ಪ್ರಕಾರ, ಶಿಕ್ಷಣ ಇಲಾಖೆಯು ಮಾರ್ಚ್ ೧೬, ೨೦೨೩ ರಂದು ಇದೇ ರೀತಿಯ ಸುತ್ತೋಲೆಯನ್ನು ಹೊರಡಿಸಿದೆ. ಆ ಸಮಯದಲ್ಲಿ ಭಾರತೀಯ ಜನತಾ ಪಕ್ಷ (ಬಿಜೆಪಿ) ರಾಜ್ಯದಲ್ಲಿ ಅಧಿಕಾರದಲ್ಲಿತ್ತು. ಹಿಂದೆ, ದೇಶದ ಹಲವಾರು ರಾಜ್ಯ ಸರ್ಕಾರಗಳು ರಂಜಾನ್ ಸಮಯದಲ್ಲಿ ಶಾಲಾ ಸಮಯದಲ್ಲಿ ಈ ಬದಲಾವಣೆಯನ್ನು ಅನುಮತಿಸಿವೆ.

ತೀರ್ಪು:

ಈ ಆರೋಪವನ್ನು ವಿಶ್ಲೇಷಿಸಿದಾಗ ಕರ್ನಾಟಕ ಶಿಕ್ಷಣ ಇಲಾಖೆ ಹೊರಡಿಸಿದ ಪ್ರಮಾಣಿತ ಸುತ್ತೋಲೆಯ ಕೆಲವು ವಿಷಯಗಳನ್ನು ಬಿಟ್ಟುಬಿಡಲಾಗಿದೆ ಎಂದು ತಿಳಿದುಬಂದಿದೆ. ಉರ್ದು ಶಾಲೆಗಳ ಸಿಬ್ಬಂದಿ ಮತ್ತು ವಿದ್ಯಾರ್ಥಿಗಳು ರಂಜಾನ್ / ರಂಜಾನ್ ಸಮಯದಲ್ಲಿ ಉಪವಾಸ ಮಾಡುವ ಕಾರಣ ತಮ್ಮ ಶಾಲಾ ದಿನಗಳನ್ನು ಬೇಗ ಪ್ರಾರಂಭಿಸಬೇಕು ಮತ್ತು ಮುಗಿಸಬೇಕು ಎಂದು ಸುತ್ತೋಲೆ ಹೇಳಿದೆ. ಆದಾಗ್ಯೂ, ಸಾಮಾಜಿಕ ಮಾಧ್ಯಮ ಬಳಕೆದಾರರು ಶಾಲಾ ಸಮಯದ ಬದಲಾವಣೆಯು ಎಲ್ಲಾ ಸರ್ಕಾರಿ ಶಾಲೆಗಳಿಗೆ ಅನ್ವಯಿಸುವುದಿಲ್ಲ ಮತ್ತು ಆಡಳಿತಾರೂಢ ಕಾಂಗ್ರೆಸ್ ಸರ್ಕಾರವು ಅಂತಹ ಅಭ್ಯಾಸವನ್ನು ಪ್ರಾರಂಭಿಸಲಿಲ್ಲ ಎಂಬ ಅಂಶವನ್ನು ಬಿಟ್ಟು ಅಲ್ಪಸಂಖ್ಯಾತರ ತುಷ್ಟೀಕರಣದ ರಾಜಕೀಯ ಕೋನವನ್ನು ನೀಡಿದ್ದಾರೆ. ಆದ್ದರಿಂದ, ಇಂತಹ ಆರೋಪಗಳು ತಪ್ಪುದಾರಿಗೆಳೆಯುವಂತಿವೆ.