ಕೇರಳದ ವಯನಾಡ್ ಪ್ರವಾಹ ಮತ್ತು ಭೂಕುಸಿತಕ್ಕೆ ಚೀನಾದ ವೀಡಿಯೋವನ್ನು ತಪ್ಪಾಗಿ ಸಂಬಂಧಿಸಲಾಗಿದೆ
ಸಾರಾಂಶ:
ಸಾಮಾಜಿಕ ಮಾಧ್ಯಮ ಬಳಕೆದಾರರು ವೀಡಿಯೊವನ್ನು ಕೇರಳದ ವಯನಾಡಿನಲ್ಲಿ ಇತ್ತೀಚೆಗೆ ಸಂಭವಿಸಿದ ಪ್ರವಾಹ ಮತ್ತು ಭೂಕುಸಿತವನ್ನು ಚಿತ್ರಿಸುತ್ತದೆ ಎಂಬ ಹೇಳಿಕೆಯೊಂದಿಗೆ ಹಂಚಿಕೊಂಡಿದ್ದಾರೆ. ಆದರೆ, ವೀಡಿಯೋ ವಾಸ್ತವವಾಗಿ ಜೂನ್ ೨೦೨೪ ರಿಂದ ಚೀನಾದ ಮೀಝೌನಲ್ಲಿನ ಪ್ರವಾಹವನ್ನು ತೋರಿಸುತ್ತದೆ. ವೈರಲ್ ವೀಡಿಯೋವು ಸಂಬಂಧವಿಲ್ಲದ ಘಟನೆಯನ್ನು ತೋರಿಸುತ್ತದೆ, ಇದು ಈ ಹೇಳಿಕೆಯನ್ನು ತಪ್ಪಾಗಿಸುತ್ತದೆ.
ಹೇಳಿಕೆ:
ಜುಲೈ ೨೦೨೪ ರ ಕೊನೆಯಲ್ಲಿ, ಕೇರಳದ ವಯನಾಡ್ ಜಿಲ್ಲೆಯು ಭಾರೀ ಮಾನ್ಸೂನ್ ಮಳೆಯಿಂದಾಗಿ ತೀವ್ರ ಪ್ರವಾಹ ಮತ್ತು ಭೂಕುಸಿತವನ್ನು ಅನುಭವಿಸಿತು. ಈ ದುರಂತವು ಗಮನಾರ್ಹವಾದ ಜೀವ ಮತ್ತು ಆಸ್ತಿ ನಷ್ಟಕ್ಕೆ ಕಾರಣವಾಯಿತು, ವ್ಯಾಪಕ ಕಾಳಜಿ ಮತ್ತು ಪರಿಹಾರ ಪ್ರಯತ್ನಗಳನ್ನು ಪ್ರೇರೇಪಿಸಿತು. ಎಕ್ಸ್ (ಹಿಂದೆ ಟ್ವಿಟರ್) ಬಳಕೆದಾರರು ವೇಗವಾಗಿ ಏರುತ್ತಿರುವ ಪ್ರವಾಹದಿಂದ ಗೇಟ್ ಹಾಕಿರುವ ಕಾಂಪೌಂಡ್ ಮುಳುಗುತ್ತಿರುವ ವೀಡಿಯೋವನ್ನು ವ್ಯಾಪಕವಾಗಿ ಹಂಚಿಕೊಂಡಿದ್ದಾರೆ. ಈ ದೃಶ್ಯಾವಳಿಗಳು ಕೇರಳದ ವಯನಾಡಿನಲ್ಲಿ ಇತ್ತೀಚಿನ ವಿನಾಶಕಾರಿ ಪ್ರವಾಹಗಳು ಮತ್ತು ನಂತರದ ಭೂಕುಸಿತವನ್ನು ಚಿತ್ರಿಸುತ್ತದೆ ಎಂದು ಪೋಷ್ಟ್ ಗಳು ಹೇಳುತ್ತವೆ. ಎಕ್ಸ್ ಬಳಕೆದಾರರು ಜುಲೈ ೩೦, ೨೦೨೪ ರಂದು ವೀಡಿಯೋವನ್ನು ಈ ಶೀರ್ಷಿಕೆಯೊಂದಿಗೆ ಹಂಚಿಕೊಂಡಿದ್ದಾರೆ - "ಕೇರಳದ #wayanad ನಲ್ಲಿ ಭಯ೦ಕರದ ದೃಶ್ಯಾವಳಿ. #WayanadLandslide #WayanadDisaster." ಈ ಪೋಸ್ಟ್ ೩.೯೨ ಲಕ್ಷಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ಇದೇ ರೀತಿಯ ಹೇಳಿಕೆಗಳನ್ನು ಇತರ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳಲ್ಲಿ ಹಂಚಿಕೊಳ್ಳಲಾಗಿದೆ.
ಜುಲೈ ೩೦, ೨೦೨೪ ರಂದು ವೈರಲ್ ವೀಡಿಯೋವನ್ನು ಹಂಚಿಕೊಳ್ಳುವ ಎಕ್ಸ್ ಪೋಷ್ಟ್ ನ ಸ್ಕ್ರೀನ್‌ಶಾಟ್.
ಪುರಾವೆ:
ನಾವು ವೈರಲ್ ವೀಡಿಯೋದಿಂದ ಕೀಫ್ರೇಮ್‌ಗಳನ್ನು ಬಳಸಿ ರಿವರ್ಸ್ ಇಮೇಜ್ ಸರ್ಚ್ ನಡೆಸಿದ್ದೇವೆ. ಇದು ನಮ್ಮನ್ನು ಯೂಟ್ಯೂಬ್ ನಲ್ಲಿ ಜೂನ್ ೨೫, ೨೦೨೪ ರಂದು "ಡಿಸಾಸ್ಟರ್ ಅಪ್‌ಡೇಟ್" ಹೆಸರಿನ ಚಾನಲ್ ಮೂಲಕ ಅಪ್‌ಲೋಡ್ ಮಾಡಿದ ಮೂಲ ವಿಡಿಯೋಗೆ ಕರೆದೊಯ್ಯಿತು. "೧೬ ಜೂನ್ ೨೦೨೪ - ಮೀಝೌ, ಗುವಾಂಗ್‌ಡಾಂಗ್, ಚೀನಾ - ತೀವ್ರ ಪ್ರವಾಹದ ಟೈಮ್‌ಲ್ಯಾಪ್ಸ್" ಶೀರ್ಷಿಕೆಯ ಈ ವೀಡಿಯೋ, ಅದರ ನಿಜವಾದ ಮೂಲ ಮತ್ತು ದಿನಾಂಕವನ್ನು ಸ್ಪಷ್ಟವಾಗಿ ಸೂಚಿಸುತ್ತದೆ.
ಜೂನ್ ೨೪, ೨೦೨೪ ರಂದು ದಿ ಎಪೋಕ್ ಟೈಮ್ಸ್ ಎಕ್ಸ್ ನಲ್ಲಿ ಹಂಚಿಕೊಂಡಿರುವ ಅದೇ ವೀಡಿಯೋ ಕ್ಲಿಪ್ ಅನ್ನು ನಾವು ಕಂಡುಕೊಂಡಿದ್ದೇವೆ. ಅದರ ಶೀರ್ಷಿಕೆ ಹೀಗೆಂದು ಹೇಳುತ್ತದೆ - "ಜೂನ್ ೧೬, ೨೦೨೪ ರಂದು, ಪಿಂಗ್ಯುವಾನ್ ಕೌಂಟಿ, ಮೀಝೌ ನಗರದ ಹುವಾಂಗ್ಟಿಯನ್ ಗ್ರಾಮದಲ್ಲಿರುವ ಹುವಾಂಗ್ಟಿಯನ್ ಜಲಾಶಯವು ಇದ್ದಕ್ಕಿದ್ದಂತೆ ಪ್ರವಾಹವನ್ನು ಬಿಡುಗಡೆ ಮಾಡಿತು. ಕಣ್ಗಾವಲು ಕ್ಯಾಮೆರಾಗಳು ಸೆರೆಹಿಡಿಯಲ್ಪಟ್ಟವು. ಜೂನ್ ೨೧ ರಂದು ೧೫:೦೦ ಕ್ಕೆ ಪಿಂಗ್ಯುವಾನ್ ಕೌಂಟಿಯಲ್ಲಿ ಭಾರಿ ಮಳೆಯ ವಿಪತ್ತು ಸಂಭವಿಸಿದೆ ಎಂದು ಅಧಿಕಾರಿಗಳು ಘೋಷಿಸಿದರು, ಪಿಂಗ್ಯುವಾನ್ ಕೌಂಟಿಯ ಝಾಂಗ್ಯಾನ್ ಹಳ್ಳಿಯಲ್ಲಿನ ಒಂದು ಅಂಗಳದ ಪ್ರಕ್ರಿಯೆಯು ಪ್ರವಾಹಕ್ಕೆ ಒಳಗಾಯಿತು. ಮೀಝೌ ನಗರವು ಒಟ್ಟು ೩೮ ಸಾವುಗಳಿಗೆ ಕಾರಣವಾಯಿತು ಮತ್ತು ಇಬ್ಬರು ಕಾಣೆಯಾಗಿದ್ದಾರೆ" (ಅನುವಾದಿಸಲಾಗಿದೆ).
ಜೂನ್ ೨೫, ೨೦೨೪ ರಂದು ಅಪ್‌ಲೋಡ್ ಮಾಡಲಾದ ಡಿಸಾಸ್ಟರ್ ಅಪ್‌ಡೇಟ್‌ನ ಯೂಟ್ಯೂಬ್ ವೀಡಿಯೋದ ಸ್ಕ್ರೀನ್‌ಶಾಟ್.
ಇಂಗ್ಲಿಷ್ ಮತ್ತು ಮ್ಯಾಂಡರಿನ್ ಎರಡರಲ್ಲೂ ಕೈಗೊಂಡ ಹೆಚ್ಚಿನ ಸಂಶೋಧನೆಯು ಈ ವೀಡಿಯೋದ ಸ್ಕ್ರೀನ್‌ಶಾಟ್‌ಗಳನ್ನು ಒಳಗೊಂಡಿರುವ ಚೀನೀ ಸುದ್ದಿ ವರದಿಗಳಿಗೆ ನಮ್ಮನ್ನು ಕರೆದೊಯ್ಯಿತು. ಚೀನಾದ ಗ್ವಾಯಂಗ್‌ಡಾಂಗ್ ಪ್ರಾಂತ್ಯದಲ್ಲಿರುವ ಮೀಝೌನಲ್ಲಿ ಪ್ರವಾಹ ಸಂಭವಿಸಿದೆ ಎಂದು ಈ ವರದಿಗಳು ಬಹಿರಂಗಪಡಿಸಿವೆ. ಜೂನ್ ೧೬, ೨೦೨೪ ರಂದು, ಮೀಝೌ ಪ್ರದೇಶದಲ್ಲಿನ ಹುವಾಂಗ್ಟಿಯನ್ ಜಲಾಶಯದಿಂದ ನೀರನ್ನು ಬಿಡುಗಡೆ ಮಾಡಲಾಯಿತು, ಇದು ತ್ವರಿತ ಪ್ರವಾಹಕ್ಕೆ ಕಾರಣವಾಯಿತು. ಹುವಾಂಗ್ಟಿಯನ್ ಗ್ರಾಮವು ಕೆಲವೇ ಗಂಟೆಗಳಲ್ಲಿ ಮುಳುಗಿತು, ನೀರಿನ ಮಟ್ಟವು ಎರಡು ಮೀಟರ್‌ಗೆ ಏರಿತು. ಜೂನ್ ೨೧, ೨೦೨೪ ರ ರಾಯಿಟರ್ಸ್ ನ "ದಕ್ಷಿಣ ಚೀನಾ ಪ್ರವಾಹದಲ್ಲಿ ಸಾವಿನ ಸಂಖ್ಯೆ ೩೮ ಕ್ಕೆ ಏರಿದೆ" ಎಂಬ ಶೀರ್ಷಿಕೆಯ ವರದಿಯು ಆ ಪ್ರದೇಶದಲ್ಲಿ ಇದೇ ಅವಧಿಯಲ್ಲಿ ತೀವ್ರ ಪ್ರವಾಹವನ್ನು ದೃಢಪಡಿಸುತ್ತದೆ. ಈ ಅಂತರರಾಷ್ಟ್ರೀಯ ವರದಿಯು ವೀಡಿಯೋದ ಮೂಲ ಮತ್ತು ಸಮಯವನ್ನು ದೃಢೀಕರಿಸುತ್ತದೆ.
ಜೂನ್ ೨೪, ೨೦೨೪ ರ ಒಂದು ಚೀನೀ ಸುದ್ದಿ ವರದಿಯ ಸ್ಕ್ರೀನ್‌ಶಾಟ್.
ಚೀನಾದ ಪ್ರವಾಹದ ವೀಡಿಯೋವನ್ನು ಆನ್‌ಲೈನ್‌ನಲ್ಲಿ ಮೊದಲು ಹಂಚಿಕೊಂಡ ಒಂದು ತಿಂಗಳ ನಂತರ ಜುಲೈ ೨೦೨೪ ರ ಕೊನೆಯಲ್ಲಿ ವಯನಾಡಿನಲ್ಲಿ ಭೂಕುಸಿತ ಸಂಭವಿಸಿದೆ ಎಂದು ಇದು ದೃಢಪಡಿಸುತ್ತದೆ. ಕೇರಳದ ಸ್ಥಳೀಯ ಸುದ್ದಿವಾಹಿನಿಗಳು ವಯನಾಡ್ ದುರಂತದ ನೈಜ ದೃಶ್ಯಗಳು ಮತ್ತು ಚಿತ್ರಗಳನ್ನು ಹಂಚಿಕೊಂಡಿವೆ, ಇದು ವೈರಲ್ ವೀಡಿಯೋಗೆ ಯಾವುದೇ ಹೋಲಿಕೆಯನ್ನು ಹೊಂದಿಲ್ಲ. ವಯನಾಡ್ ಭೂಕುಸಿತ ಮತ್ತು ಪ್ರವಾಹಕ್ಕೆ ವೈರಲ್ ವೀಡಿಯೋವನ್ನು ಸಂಬಂಧಿಸುವ ಯಾವುದೇ ವಿಶ್ವಾಸಾರ್ಹ ವರದಿಗಳು ಅಥವಾ ಅಧಿಕೃತ ಹೇಳಿಕೆಗಳು ನಮಗೆ ಕಂಡುಬಂದಿಲ್ಲ.
ತೀರ್ಪು:
ವಯನಾಡ್ ಪ್ರವಾಹ ಮತ್ತು ಭೂಕುಸಿತದ ದೃಶ್ಯಗಳಾಗಿ ಹಂಚಿಕೊಳ್ಳಲಾದ ವೀಡಿಯೋವು ವಾಸ್ತವವಾಗಿ ಚೀನಾದ ಮೀಝೌನಿಂದ ಜೂನ್ ೨೦೨೪ ರಲ್ಲಿ ರೆಕಾರ್ಡ್ ಮಾಡಲ್ಪಟ್ಟಿದೆ. ಕೇರಳದಲ್ಲಿ ಇತ್ತೀಚಿನ ದುರಂತಕ್ಕೆ ಯಾವುದೇ ಸಂಬಂಧವಿಲ್ಲ. ಆದ್ದರಿಂದ ಈ ವೀಡಿಯೋದೊಂದಿಗೆ ಪ್ರಸಾರವಾಗುತ್ತಿರುವ ಹೇಳಿಕೆ ತಪ್ಪು.
